පාළුව දෙවනත් කරලා නාඬන් උලලේනෝ

විරහව විඳින පෙම්වතෙකුට, තනිකම විඳින තනිකඩයෙකුට ගුණදාස කපුගේ ශූරීන් ගයන මේ ගීය තරම් හිතට දැනෙන ගීතයක් නොමැති තරම්ය. කෙසේ වෙතත් ගීත රචක රන්බණ්ඩා සෙනෙවිරත්නයන් ගීතයට පාදක කොටගෙන ඇති වස්තුබීජය “ප්‍රේමය” මාතෘකාවෙන් තරමක් ඔබ්බට යන්නකි.
එක්දහස් නවසිය හැත්තෑ එකේ අප්‍රේල් කැරැල්ල තුලින් ඊට දායක වූවෙකු එයින් ලබන පරාජයත් සමග කැලයේ සැඟවී සිටිද්දී ඔහුට දැනෙන තනිකම, සගයන්ගෙන් ඈත් වීම තුලින් ඇති වූ දුක මේ ගීතය රචනා කිරීමෙහිලා රන්බණ්ඩා සෙනෙවිරත්නයන්ට හේතු වී ඇත.
උලලේනා, උලමා හා බැඳුනු විවිධ කතාන්දර හා මතයන් ගැමි සමාජය බොහොමයක් පවතී.සමස්තයක් ලෙස සලකද්දී උලලේනා කෙරෙහි සමාජය තුලින් ජනිත වන්නේ එතරම් සුභවාදී ආකල්පනම් නොවෙයි. උල ලේනෙක් හැඩීම ගමක ආසන්න මරණ සතක් සිදුවීමට හේතුවක් බවද ඇතැම් වැඩිහිටියන්ගේ මතයයි .
කෙසේ වෙතත් “උලලේනෝ” පදය භාවිතා කිරීම තුලින් ගීතය තුලින් දනවන්නට උත්සහ කරන පාළුව, දුක ,අසුභවාදී බව දෙගුණ තෙගුණ වී තිබෙනවා.

පාළුව දෙවනත් කරලා නාඬන් උලලේනෝ….. කාටත් නපුරු දා තනිකම් ඇතිවෙනවා උලලේනෝ…..

කිසිවෙකුත් නොමැතිව තනිව වනයේ දිවි ගෙවන ඔහුට මෙන්ම අනිත් සගයින්ටත් මේ උදා වී ඇත්තේ ඉතා නරක කාලයක්.උලලේනාගේ හඬේ ඇති දුක්බර අදෝනා බව නිසා තනිකම තවත් තීව්ර වන හෙයින් ඔහු උලලෙනාගෙන් අසරණව යදින්නේ හැඩීම නවත්වන ලෙසය.

සීත සුළං හිරිකඩයි කැලේ අපට උරුමේ…. උඹට පිහාටුයි මට පැල්පතයි තියෙන්නේ උලලේනෝ….

ඔහු මේ ගෙවන්නේ සැප පහසු කාලයක් නොවෙයි. සීත සුළං හිරිකඩයි යනුවෙන් රචකයා අදහස් කර ඇත්තේ ඔහු සිටින භයංකර තත්වයයි.වනයේ ජීවත් වෙන ඔහු උලලේනා හට පවසනවා උලලේනාට පිහාටු පමණක් තිබෙන්නක්මෙන් ඔහුටද ඉතිරිව ඇත්තේ අටවා ගත් පැල්පත පමණක් බව.

ඉහිරුණු කිරි කොතලෙට ඉකි බිඳලා පල නෑ…… උඹටත් එක්කයි මම මේ කවිය කියන්නේ උලලේනෝ….

සියල්ල සිදු වී හමාරයි දැන් තව දුරටත් හඬා පලක් නොවෙයි.තව යමක් කෙරුවද පලක් නොවෙයි.තමා අවබෝධ කර ගත් දුක් බර වේදනාව ඔහු උලලේනාටද කියා දෙයි.

සංසාරේ හැටි තමයි වියෝග ඇතිවන්නේ…. නිවනට ගිය දා මේ හැම දුක නැතිවන්නේ උලලේනෝ…..

කැරැල්ල අසාර්ථක වී සිය සගයින්ද දිවි පුදා හමාරය. නමුත් ඔහු තවම සිය විමුක්තිය අත් හැර පරාජය භාර ගැනීමට සුදානම් නොමැත.එවැනි අරගලයකදී ඇතිවන තත්වය පිලිබදව බව ඔහු නොදැන සිටියා නොවේ.මේ දුක් සියල්ල අවසන් වෙන්නේ කෙසේ හෝ ඔවුන් ඔවුනට අවැසි ලෝකය ලබා ගත් විට පමණක් බව ඔහු තමන්ට සිටින එකම මිත්‍රයා වන උලලෙනාට පවසයි.
ගීතය එසේ අවසන් වත්ම තවත් පැනයක් සිතේ පවතියි. ඒ “උලලේනා” යනුවෙන් මෙම ගීතයේ හඳුන්වා ඇත්තේ දුක් විඳින, අසරණව තම දුක කියා ගැනීමට නොහැකිව හඬන සමස්ත ජනතාවදෝ කියායි.
ගීතයේ අර්ථය එසේ වෙද්දී ගීතය රස විඳින ශ්‍රාවකයින්ට ඔවුනොවුන්ගේ ජීවිත වලට, මාතෘකා වලට ගීතය ඈඳා ගැනීමට සම්පූර්ණ ඉඩ හසර රචකයාණන් විසින් ඉතා විශිෂ්ට ලෙස ලබා දී ඇත.